Am Mäntigmorge früech nöime imne Bärner Tram
«Grüessech, aui Bilee vorwise bitte.»
Portemonnaie zücke, Halbtax u Libero fürenä. Ah, schad, das cheibe Libero isch leidr nid im Fächli, wos sött si.
«Dir, i finges nid, isch äuä deheim ufem Chuchitisch.»
«Ja, das miech de 100 Franke. Weitr grad bar zahle odr e Rächnig?»
«Gärn bar.»
«Weitr das anonym mache?»
«Nenei, miner Personalie dörftr scho wüsse, i wott de das Gäud zrügg. Zmingscht dr Beleg hani uf au Fäu no deheim.»
«Ah, de isch ja guet, de göötr de eifach mit em Abi odr em Beleg dert häre, wo dr ds Bilee kouft heit u de überchömeter d Buess zrügg, minus föif Franke Bearbeitixgebühr.»
«Schguet, messi u schöne Tag.»
Am Abe deheim isch das Bilee äbe nid fürecho, nume no dr Beleg.
Am nächschte Tag im Bilee-Hüsi
«Grüessech, dir, mir isch e Seich passiert u dasch fougendermasse gange …»
«Ja dir, das Gäud vo dere Buess chani öich hie nid umegäh, da müesstr zum Eigerplatz, mir mache hie gar nüt Settix. I chanech höchschtns es Ersatzabi gäh für 30 Franke. Weitr das?»
«30 Franke für nes Abi, wo nume no zwo Wuche louft aus Ersatz für eis, woni scho 72 zaut ha? Nei schgadguet, messi.»
Am Telefo mitere Frou BärnMobiu am Eigerplatz
«Grüessech, dir, mir isch e Seich passiert u dasch fougendermasse gange …, was chöimr da mache?»
«Nüt.»
«Äh, wie nüt. Überchumeni das Gäud vo dr Buess nid zrügg?»
«Nei, nume gäge s Original-Abi, süsch chönnt ja öpprangr mit öiem Abi umefahre, das schteit ja schliesslech o so iden AGB, wo dir akzeptieret, wedr ines Tram schtiget.»
«Das heisst, dä Beleg isch für Pfüx?»
«Ja, dert druf xee mir ja nid, vo wenn bis wenn das Abi wär güutig xi.»
«Dir, für was weit de dir aube s Haubtax luege, wemenes Abi chouft?»
«Öies Haubtax isch d Grundcharte zum Libero.»
«Auso chönnt niemer angers mit mim Abi desumefahre, wiu ja schliesslech mis Haubtax-Nummero druffe schteit.»
«Wüsstr, üser Kontrollöre xee nid geng aus u ussrdäm giz geng wi mee Fäutschige.»
«Ah so. U wi xeez de iz us mitem Ersatzabi?»
«Das giz o nid, da heitr im Bileehüsi e fautschi Uskunft übercho.»
